Wednesday 27 March 2013

Isua nen chuan ropuina (Tumkau Ni pual)


A tuk zing a han harh chu rilru hlim takin a hma ni a thil thleng kha a ngaihtuah neuh neuh a. Ni e, he ni hi a tana ni ropui ber a ni ngei ang. Khatiang ang reng reng khan a hringnunah mite chawimawina a la tawng ngai lo a ni. Tlemin a lo chapo ve deuh a ni ngei ang.
            Chutia a ngaihtuah lai chuan a hma ni a an kalna tuichhunchhuah bul chu a lo thleng tawh a. Mi lo vei nak nak bulah chuan a va kal hnai a, nimin ang a miten anlo hriat leh nghal mai a ring a. Mahse maktak maiin tuman anlo hre tawh reng reng lo mai. Tui thal turin tuichhunchhuahah lam an pansan vek a. Chu Sabengtung chu mitsir pawhin tuman an melh eih lo. “In puante kha lathlain rawn phah leh ta che u” tiin an auva, mahse chulaia lo awmte chuan a thusawi chu a ngaihna hrelo takin chu Sabengtung khawngaithlak tak chu an vua a, an hnawt bo ta a ni.
            “A va han mak em em ve” ti a phun nuah nuah chungin khawnge nimina kan kalna kawtthlerah khan ka’n kal mai teh ang, khatah kha chuan mifel tak tak an awm ngei ang ti rilru chungin phurlo takin a kal phei a. Mahse, a hmaa a kalna nen danglamna a awm chuang lo-tumahin anlo hre tawh reng reng lo. Kawtthlera a kal lai te chuan amah han hria a han uksak hmel pu pawh an awmlo a ni.
            Tumkau hnah te kha nimin khan inlo vai a ni si a, khawiah nge a awm zawh tak tiin a au va,mahse thehhmeh ang hlauh a ni, tumahin chhan enah pawh anlo en silo.
            Rilru hreawm leh a ngaihna hrelo takin a nu hnenah a kir leh ta a. A nu chuan eng danga chhanglo chuan “Mimawl tak i nih hi, AMAH a telloh chuan engtin nge nangmah maiin khang chawimawina zawng zawng kha i dawn theih tawh ang” tiin a lo zilhhau a ni.


(Source: Adapted from Hot Illustrations for Youth Talks by Wayne Rice. Copyright 1994 by Youth Specialties, Inc.)

No comments:

Post a Comment